काठमाडौं । आगामी नयाँ वर्ष २०८१ को वैशाख १ गतेदेखि लागु हुने गरी १३ वाणिज्य बैंकले ब्याजदर घटाएका छन् । २० वाणिज्य बैंकहरूमध्ये पाँचवटाले चैतकै दरमा निक्षेपमा ब्याज दिने भएका छन् ।

दुई वाणिज्य बैंकले ब्याजदर बढाए पनि औसतमा भने वाणिज्य बैंकहरूको ब्याजदर वैशाखमा ०.१८३ प्रतिशत विन्दुले घटेको छ । चैतमा वाणिज्य बैंकहरूको औसत ब्याजदर ७.२५४ प्रतिशत रहेकोमा आगामी वैशाखमा औसत ब्याजदर ७.०७१ प्रतिशत हुने भएको छ ।

एनआईसी एसियादेखि कुमारी, प्रभु, राष्ट्रिय वाणिज्य बैंकले भने ब्याज घटाएका छन् । सबैभन्दा बढी ब्याजदर घटाउनेमा एनआईसी एसिया बैंक छ । यो बैंकल चैतको तुलनामा ०.७९८ प्रतिशत विन्दुले निक्षेपमा दिने ब्याजदर घटाएको छ ।

बैंकहरूले निक्षेपमा कम ब्याज दिए पनि कर्जामा पनि यी बैंकको ब्याजदर कम हुन्छ । निक्षेपमा बढी ब्याज दिने बैंकहरूको कर्जाको ब्याजदर पनि महँगोे हुन्छ ।

दुई वाणिज्य बैंकले भने वैशाखमा ब्याजदर बढाएका छन् । निक्षेप तान्नका लागि एनएमबी र एभरेष्ट बैंकले निक्षेपमा बढी ब्याज दिने भएका छन् । एनएमबीले ०.९७ प्रतिशत विन्दुले ब्याजदर बढाएको छ । एभरेष्टले ०.५ प्रतिशत विन्दुले ब्याजदर बढाएको छ ।

निक्षेपमा एनएमबीले अधिकतम ७.९७ प्रतिशत ब्याज दिने निर्णय गरेको छ । चैतमा यो बैंकले ७ प्रतिशत मात्र ब्याज दिने निर्णय गरेको थियो । एनएमबीमा नेपाल बैंकर्स संघका अध्यक्ष सुनील केसी प्रमुख कार्यकारी अधिकृत छन् ।

त्यसैगरी वाणिज्य बैंकहरूले संस्थागत निक्षेपमा भने साधारण निक्षेपमा दिने ब्याजभन्दा एक प्रतिशत विन्दुभन्दा कम ब्याज दिँदै आएका छन् । त्यस्तै रेमिट्यान्स खातामा भने बैंकहरूले साधारण निक्षेपका एक प्रतिशत विन्दु बढी ब्याज दिनुपर्ने व्यवस्था छ ।